Европа Иттифоқи Россия газига муҳтож(ми)?

Европа Иттифоқи Россия газига муҳтож эмас ва Украина орқали транзитни тўхтатишга тайёр — энергетика бўйича Европа комиссари.

"Декабрда тугайдиган транзит келишуви узайтирилмаса, Европа Иттифоқи Украина орқали Европага кирувчи Россия газини бошқа манбага алмаштира олади", дея маълум қилди Кадри Симсон.

"Мен вазирларга Россия ва Украинанинг “Нафтогаз” компанияси ўртасидаги шартномани бекор қилишга тайёрлигимизни яна бир бор тасдиқладим", дея Симсоннинг сўзларидан иқтибос келтирмоқда Reuters агентлиги. Унинг сўзларига кўра, Европа Иттифоқи Россия Федерациясининг газисиз ҳам “яшаши” мумкин, баъзи давлатлар томонидан бундай газ етказиб беришнинг давом этиши зарурат эмас, балки “сиёсий хавфли қарордир”.

Аввалроқ Украина президенти Зеленский Киев “Нафтогаз” ва “Газпром” ўртасидаги шартномани узайтирмаслигини, шунинг учун Россия газининг Европага транзити 2025 йил 1 январдан тўхтатилиши кераклигини айтганди. Айни пайтда Украина билан уруш давом этаётганига қарамай, Россия бу ҳудуд орқали Австрия, Словакия, Венгрия ва Чехия каби Европа Иттифоқи мамлакатларига газ етказиб бермоқда.