Маҳаллий матбуотга кўра, Жанубий Африкадаги қироллик “учинчи давлат келишувлари” асосида АҚШдан депортация қилинган камида 15 нафар шахсни қабул қилган.
Жанубий Африканинг Эсватини қироллиги АҚШдан депортация қилинган муҳожирларни қабул қилгани учун Вашингтон маъмуриятидан 5,1 миллион доллар олди. Бу ҳақда қироллик молия вазири Нил Райкенберг парламентда маълум қилди.
Вазирнинг айтишича, ҳукумат АҚШ билан тузилган “учинчи давлат келишувлари” доирасида депортация қилинган муҳожирларни қабул қилиш эвазига ушбу маблағни олган.
Райкенберг бу жараённинг шаффофлиги масаласи ҳукумат томонидан муҳокама қилинаётганини таъкидлади.
Маҳаллий матбуотга кўра, Эсватини умумий 160 нафар муҳожирни қабул қилиш бўйича келишувга эга бўлиб, уларнинг камида 15 нафари АҚШдан депортация қилинган ҳолда қиролликка олиб келинган.
Хабарларга кўра, ушбу шахслар пойтахт Мбабанедаги Мацабха қаттиқ тартибли қамоқхонасида ҳеч ким билан алоқа қилмасдан сақланмоқда. Кейинчалик улар ўз ватанларига қайтарилади.
Аввалроқ Руанда, Жанубий Судан ва Уганда каби давлатлар ҳам Трамп маъмурияти томонидан Африка ва Лотин Америкасида амалга оширилган “учинчи давлат келишувлари” доирасида АҚШдан депортация қилинган муҳожирларни қабул қилган эди.
Муҳожирлар ҳуқуқлари фаоллари бу амалиётни танқид қилиб, унинг халқаро қонунлар бузилишига, бошпана изловчилар хавфсизлигига таҳдид солишига ва одамларни инсон ҳуқуқлари ҳимояси паст бўлган давлатларга ўтказилишини кўзда тутишини таъкидламоқда.
Зеленский "тарихий келишув"ни эълон қилди
Сибирдан Орол денгизига сув йўналтирилиши мумкин
Россиянинг Су-57 самолётларига харидор топилди
