Эроннинг янги олий раҳбари яраланганми?

Исроил ва АҚШ расмийларига кўра, Эроннинг янги олий раҳбари Можтабо Хоминаий яраланган. The New York Times ёзишича, айнан шунинг учун ҳам Можтабо Хоминаий олий етакчи лавозимига сайлангани эълон қилинганидан кейин оммага кўриниш бермаган.

Исроил манбалари Можтабо Хоминаий АҚШ ва Исроилнинг Эрон билан урушининг биринчи кунида, отаси оятуллоҳ Али Хоминаий ўлдирилганда оёғидан яраланганини билдирган.

The New York Times’нинг Эрондаги манбалари ҳам кичик Хоминаий жароҳат олганини маълум қилган, бироқ қачон ва қандай ҳолатда жароҳатланганига аниқлик киритмаган.

Эрон президенти Масъуд Пизишкиённинг ўғли, отаси маъмуриятида маслаҳатчи лавозимида ишлайдиган Юсуф эса Можтабо Хоминаийнинг аҳволи яхши эканини эълон қилди.