Эрон президенти: Исроил ҳужумлари АҚШ билан музокараларни «маъносиз» қилади

Эрон президенти Масуд Пезешкиан Исроилнинг Ливанга ҳужумлари АҚШ билан режалаштирилган музокараларни маъносиз қилиши мумкинлигини маълум қилди.

У ўз баёнотида бу ҳужумлар Вашингтон билан эришилган ўт очишни тўхтатиш келишувининг бузилиши эканини таъкидлади.

Пезешкиан ижтимоий тармоқдаги чиқишида Исроилнинг Ливанга такрорий зарбаларини кескин танқид қилди.

«Сионистик режимнинг Ливанга қарши қайта-қайта агрессияси ўт очишни тўхтатиш бўйича дастлабки келишувнинг очиқдан-очиқ бузилишидир», — деди у.

Эрон раҳбари бу ҳолатни «алдаш ва хавфли сигнал» деб атаб, бундай вазиятда ҳар қандай эҳтимолий келишувларга амал қилинмаслиги мумкинлигидан хавотир билдирди.

Мутахассислар фикрича, мазкур баёнот Эрон ва АҚШ ўртасидаги дипломатик жараён янада мураккаблашиши мумкинлигини кўрсатади. Агар ҳужумлар давом этса, музокаралар тўхтаб қолиши эҳтимоли ҳам бор.