Туркия президенти Ражаб Тоййиб Эрдўған Эронда бўлиб ўтган президентлик сайловлари ва Масуд Пезешкианнинг ғалабасидан сўнг Эрон билан муносабатларнинг ижобий ва интенсив ривожланишини кутмоқда.
«Масуд Пезешкиан аслида озарбайжонлик турк. Табризда у туркий тилда гапиради, лекин курд ҳудудларига келганда у ерда курдча гапира олади. Форс тилини ҳам яхши билади. Мен у билан боғланиб, табриклайман. Умид қиламизки, Туркия ва Эрон ўртасидаги муносабатлар келажакда яхшиланади. Қолаверса, Эрон Туркия билан минтақада энг яхши алоқаларга эга давлатдир. Эрон ҳам тарихий ва маданий алоқаларимиз бўлган муҳим қўшнидир. Мен янги даврда Туркия ва Эрон ўртасидаги икки томонлама муносабатлар ижобий ва тез суръатлар билан ривожланишини кутаман», — дейди Эрдўған.
5 июль куни Эронда навбатдан ташқари президентлик сайловларининг иккинчи босқичи бўлиб ўтди. Ислоҳотчилар қанотидан номзод, собиқ соғлиқни сақлаш вазири Масуд Пезешкиан 53,6 фоиз овоз билан ғалаба қозонди.