«Энди давлат тўнтаришини тушингизда кўрасиз!» – Жапаров

Қирғизистон президенти Садир Жапаров якшанба куни халққа қилган мурожаатида мамлакатда бундан буён давлат тўнтаришлари бўлмаслигини таъкидлади, деб хабар берди «АКИpress».

«Мамлакатда ҳокимиятни бошбошдоқлик орқали алиштиришга уринишга йўл қўйилмайди. Давлат тўнтаришлари энди бўлмайди. Биринчидан, биз тўнтаришга сабаб қолдирмаймиз. Иккинчидан, давлат илгаригидек заиф эмас, у энди кучли. Учинчидан, эндиликда халқ кимни қўллаб-қувватлаш лозимлиги ва ҳокимиятни ким бошқариши кераклигини яхши билади. Бундан кейин давлат тўнтаришларини фақат тушингизда кўрасиз! Ўғрилик, талончилик, текин бойлик кетидан қувиш, тўнтаришдан кейин мансаб ва давлат орттиришга уринишлар тушларингизда қолсин», – деган Садир Жапаров.

Қирғизистон раҳбарига кўра, мамлакатда мавжуд муаммоларни жамоатчиликка кўпиртирган ҳолда кўрсатиб одамлар норозилигини кучайтиришга уринаётган «ғаразли мақсадли гуруҳлар» мавжуд.

Қирғизистон Республикасининг 30 йиллик тарихида мобайнида президентлар инқилоб йўли билан алмашиб келмоқда. Садир Жапаровнинг ўзи ҳам 2020 йил октябрь ойида оммавий намойишлар ортидан ҳокимиятга келган эди.

Қирғизистон бош прокурорига кўра, мамлакатнинг собиқ уч президенти – Асқар Акаев, Қурманбек Бакиев ва Алмазбек Атамбаевга нисбатан жиноят ишлари қўзғатилган.

Сўнгги вақтларда Қирғизистон расмий идоралари мамлакатда оммавий тартибсизликлар тайёрлаш ва юқори лавозимдаги масъулларга қарши суиқасд уюштиришга уринишларнинг олди олингани ҳақида хабар берди.

Жумладан, жорий йил апрель ойида Миллий хавфсизлик давлат қўмитаси давлат тўнтаришининг олди олинганини маълум қилди.

Ўтган йилнинг ноябрида эса ҳокимиятни эгаллаш режасида гумонланган етти нафар шахс қўлга олинганди.

Шунингдек, Қирғизистон Миллий хавфсизлик давлат қўмитаси раиси Қамчибек Ташиевга қарши суиқасдни режалаштиргани айтилган шахс ҳам ушланганди.

Қирғизистон махсус хизмати бошлиғига кўра, яқин ўтмишда уюшган жиноят гуруҳлар бутун мамлакат бўйлаб таъсирга бўлган ва параллел давлат тамойили бўйича фаолият юритган.

Аввал хабар берганимиздек, 2023 йил февраль ойида Қирғизистоннинг амалдаги президенти Садир Жапаров БААнинг Дубай шаҳрида барча собиқ президентлар билан учрашган эди. Ушбу йиғинда Асқар Акаев (1991–2005), Қурманбек Бакиев (2005–2010), Роза Отунбаева (2010–2011), Алмазбек Атамбаев (2011–2017), Роза Отунбаева (2010–2011) ва Сооронбай Жээнбеков (2017–2020) қатнашганди. Учрашувдан кейин С.Жапаров собиқ президентлар ўз хатоларини тан олгани ва бир-бирини афв этгани ҳақида баёнот бергани маълум.