Электр ва иссиқлик энергиясини ишлаб чиқариш барқарорлиги таъминланади

Куз-қиш мавсумини барқарор ўтказиш мақсадида “Иссиқлик электр станциялари“ АЖ тизим корхоналари режа асосида 53 та шу жумладан, 14 та энергоблок, 28 та қозон қурилмаси, 7 та буғ-газ қурилмаси, 1 та турбоагрегат ва 3 та газ-турбина қурилмасида таъмирлаш ишларини амалга оширди.

Электр станциялардаги тезкор гуруҳлар томонидан камчиликлар аниқланган 11 та энергоқурилмада мукаммал ва жорий таъмирлаш ишлари олиб борилди.

Бугун АОКАда ўтказилган брифингда “Иссиқлик электр станциялари“ АЖ ахборот хизмати раҳбари Муҳаммаджон Бекмуҳаммедов шу ҳақда маълум қилди.

Унда айтиб ўтилганидек, таъмирлаш ва созлаш ишлари натижасида мавжуд электр энергияси ишлаб чиқариш қувватлари 291 МВт ва иссиқлик ишлаб чиқариш самарадорлиги 235 тонна соатга оширилишига эришилган. Шунингдек, электр станцияларда ишлаб чиқарилаётган электр энергиясини ягона энерготизимга сифатли ва барқарор узатилишини таъминлаш учун 35, 110, 220, 500 кВ кучланишли очиқ тақсимлаш қурилмалари ҳамда трансформаторларда муҳим таъмирлаш ишлари олиб борилган.

– Соҳа ходимлари томонидан 2024-2025 йиллар куз-қиш мавсумида аҳолининг электр ва иссиқлик энергиясига ўсиб бораётган талабини қондириш ва мавсумни беталафот ўтказиш мақсадида тизимли чора-тадбирлар амалга оширилмоқда. Хусусан, 29 та куч трансформаторида таъмирлаш ишлари олиб борилди. 109 та ўлчов трансформатори электр лаборатория синовларидан ўтказилди. 77 та куч трансформаторида мой ҳолати хроматографик таҳлилдан ўтказилди. 147 та ўта кучланишларни чекловчи қурилма ва алоқа конденсатори электр лаборатория синовидан ўтказилди. 10 минг 105 та улама тепловизор кўригидан ўтказилди ва бу ишлар мавсум давомида тизимли олиб борилади. 21 та ўлчов ток трансформаторининг мойи алмаштирилди, – деди М.Бекмуҳаммедов.

Шунингдек, Тошкент иссиқлик марказининг 10 та иссиқлик марказидаги 60 та қозон агрегатидан 15 таси мукаммал, 45 таси эса жорий таъмирланди.

Тадбирда таъкидланганидек, куз-қиш мавсумида “Иссиқлик электр станциялари” АЖ томонидан 26,8 миллиард киловатт соат электр энергияси ва 9,2 миллион Гкал иссиқлик энергияси ишлаб чиқариш режалаштирилган. Бунинг учун 6,2 миллиард метр куб табиий газ, 2,8 миллион тонна кўмир ва 100 миллион метр кубер ости гази сарфланиши кўзда тутилган. Зарур ҳолатларда захира ёқилғиси сифатида мазут ишлатилади.

Ахборот хизмати раҳбарининг сўзига кўра, айни кунларда барча электр станциялар ва марказларида навбатчилик асосида энергия қурилмаларнинг узлуксиз ишлаш жараёнини мувофиқлаштирувчи махсус тезкор штаблар фаолияти шакллантирилган. Қуз-қиш мавсумини беталафот ўтказиш учун улар таркибига 2 мингдан ортиқ малакали мутахассис ҳамда 112 та махсус техника бириктирилган. Раҳбар ва масъул мутахассислардан иборат 10 та навбатчилик гуруҳининг туну кун фаолияти йўлга қўйилган.