Давлат экологик экспертизаси маркази томонидан Ахборот ва оммавий коммуникациялар биносида матбуот анжумани бўлиб ўтди. Тадбир “Экологик экспертиза тўғрисида”ги Ўзбекистон Республикаси Қонунининг янги таҳрирдаги лойиҳаси муҳокамасига бағишланди.
Тадбирнинг асосий мақсади – амалдаги қонунчиликдаги камчиликлар, янги қонун лойиҳасини қабул қилишдан фуқаро ва тадбиркорлик субъектлари учун бўладиган ижобий натижалар бўйича Оммавий ахборот воситалари орқали кенг жамоатчиликка етказиш.
Анжуманда нутқ сўзлаган давлат экологик экспертизаси маркази Бош директори Ғайратжон Мухамедов қонунчиликка киритилаётган янгиликлар ва уларнинг аҳамиятига тўхталди.
“Янги таҳрирдаги қонун объектларнинг атроф-муҳитга салбий таъсирини баҳолашнинг барча жабҳаларини қамраб олади. Қолаверса, экологик экспертиза хулосалари сифати ошади, жамоатчиликнинг фаол иштироки таъминланади, — деди Ғайратжон Муҳамедов. — Бундан ташқари, Республикага сармоя киритмоқчи бўлган инвесторлар учун ишончли экологик баҳолаш тизими, давлат дастурлари, Бош режалар ва йўл хариталарининг Стратегик экологик баҳолаш тартиблари, лойиҳа ташкилотларининг рейтинг тизими ва атроф-муҳитга таъсирни баҳолаш бўйича ягона автоматлаштирилган ахборот тизими жорий этилади”.
Маълумот учун, амалдаги Қонун номи «Экологик экспертиза тўғрисида» бўлиб, янги таҳрирдаги Қонун лойиҳаси Экологик баҳолашнинг барча жабҳаларини қамраб олиши сабабли «Давлат экологик экспертизаси ва атроф-муҳитга таъсирни баҳолаш тўғрисида» этиб номланди. Шунингдек, экологик экспертиза хулосаларини беришда жамоатчилик фикрини инобатга олиш мажбуриятлари киритилди (Орхус конвенцияси талаблари асосида).
Бундан ташқари, атроф-муҳитга таъсирни баҳолаш ва Стратегик экологик баҳолаш мезонлари киритилди (Эспо конвенцияси ва Стратегик экологик баҳолаш баённомаси талаблари асосида). Шу билан бирга, амалдаги 4 та хавфлилик тоифалари халқаро талабларга мувофиқ 3 тага ўтказилди. Қонуности ҳужжатлари Вазирлар Маҳкамасининг 541-сон ва 14-сон қарорлари ўрнига тўғридан тўғри ишлайдиган Қонун лойиҳаси ишлаб чиқилди.
Шунингдек, матбуот анжуманида амалдаги «Экологик экспертиза тўғрисида»ги Қонунга киритилаётган ўзгартириш ва қўшимчалар, халқаро стандартларга мувофиқлаштирилиши, жумладан, жамоатчилик иштироки, Орхус ва Эспо конвенциялари ҳамда Стратегик экологик баҳолаш талаблари киритилиши бўйича маълумотлар берилиб, фикр-мулоҳаза муҳокама ўтказилди.
Якунда оммавий ахборот воситалари вакиллари ўзларини қизиқтирган саволларга батафсил жавоб олишди.