Дунё катта уруш ёқасида турибди...

Давлатлар унинг олдини олиш учун етарли чоралар кўрмаяпти. дея фикр билдирди Сербия президенти

Александр Вучич бундай фикрни Axel Springer медиа концерни бошқаруви раиси Матиас Дёпфнер подкастида билдирди.

"Менимча, биз катта уруш ёқасида турибмиз. Шу сабабли кимдир бунинг олдини олиш учун аллақачон чоралар кўрган бўлади, деб умид қилгандим. Аммо бундай бўлмади ва яқин орада ҳам бўлмайди. Демак, биз бундан анча жиддийроқ нарсанинг остонасида турибмиз. Беш йилдан кейин янги дунё тартибининг шакллари бугунгидан ҳам вайронкор воситалар орқали белгиланади", — деди Сербия президенти.

Вучичнинг фикрича, келгуси беш йил ичида етакчи давлатлар кўпроқ мустақилликка ва ташқи қарамликни камайтиришга интилади.

Унинг сўзларига кўра, дунёда иккита асосий куч маркази — АҚШ ва Хитой сақланиб қолади. Учинчи куч маркази Европа Иттифоқи бўлиши керак, бироқ Вучич Европанинг бу мақомни эгаллай олишига ишончи комил эмаслигини айтди.

Тўртинчи устун эса Россия, Ҳиндистон ва бошқа йирик минтақавий давлатлар бўлади. Бундан ташқари, Вучич Туркия, Покистон ва Саудия Арабистони ўртасида янги иттифоқ шаклланаётганини таъкидлади.

Сербия президенти Европа ва Россия ўртасидаги муносабатларни ҳам тилга олди. Унинг фикрича, Европа ҳозир Россия билан “гибрид уруш” ҳолатида.

"Сиз Украинани қуроллантирдингиз, Россияга қарши санкциялар жорий қилдингиз. Шу билан бирга, Украинага молиявий ёрдам кўрсатдингиз. Бу Россияга қарши гибрид уруш бўлмаса, нима?", — деди Вучич.