Жорий йилнинг август ойида «Ўзсувтаъминот» АЖ бошқарув раисининг ташаббуси билан Денов тумани Ёшлик маҳалласи Оламжаҳон қишлоғи аҳолиси учун диаметри 76 мм бўлган 19,4 км ичимлик сув қувурлари етказиб берилди. Бу ташаббус туфайли қишлоқнинг 678 нафар аҳолиси, 103 та хонадон, шунингдек, 1 та мактаб ва 1 та қишлоқ врачлик пункти илк бор тоза ичимлик сувига эга бўлди.
Аввал қишлоқ аҳолиси сувни 7-12 км узоқликдан махсус техника ёрдамида олиб келарди. Олиб келинган бир машина (3,5 м³) сувнинг нархи 300-350 минг сўмни ташкил этарди.
Мавжуд табиий булоқдан сув олиш учун 2 та каптаж қурилиб, қувурлар ўрнатилди. Денов туман сув таъминот бўлими мутахассислари ва қишлоқ аҳолисидан кўнгилли вакиллар иштирокида қурилиш ишлари якунланди. Барча ишларда жами 100 нафар ходим қатнашди.
Натижада қишлоқ аҳолиси илк бор тоза ичимлик сувига эришди.