Дания Бош вазири: "Гренландия бўйича АҚШ билан келишмовчилик ҳал қилинмади"

Дания ва Америка томонлари ўртасидаги Гренландиянинг эгалик ҳуқуқи бўйича низо ҳалигача ҳал қилинмаган.

Дания Бош вазири Метте Фредериксен буни Мюнхен хавфсизлик конференциясидаги мунозарада айтиб ўтган.

"Менимча, Америка президенти Дональд Трамп айнан шундай истакка эга (Гренландияни назорат қилиш)", деди у. "Қироллик бунга қўшилмайди. Европа бунга қўшилмайди. Лекин биз Арктикада хавфсизликни таъминлаш учун кўпроқ ишлар қилиниши кераклигига қўшиламиз."

13 февраль куни Фредериксен АҚШ Давлат котиби Марко Рубио билан учрашди. Гренландия Бош вазири Йенс-Фредерик Нилсен ҳам иштирок этди.

31 январь куни АҚШ маъмурияти Гренландиянинг келажакдаги эгалик ҳуқуқи бўйича музокаралар бошланганини эълон қилди ва АҚШ ва Европа учун яхши келишувга умид билдирди. Трамп Гренландиянинг АҚШга қўшилиши зарурлигини бир неча бор таъкидлаган.

Гренландия Даниянинг автоном ҳудудидир. 1951 йилда Вашингтон ва Копенгаген НАТО иттифоқи мажбуриятларидан ташқари Гренландия мудофаа шартномасини имзоладилар. Унга кўра, Қўшма Штатлар оролни мумкин бўлган тажовуздан ҳимоя қилишга ваъда берди.