Британия биринчи марта россиялик миллиардернинг маблағларини мусодара қилади

Британия жиноятчиликка қарши кураш агентлиги (NCA) суддан россиялик олигарх Петр Авеннинг 1,4 миллион долларини доимий равишда ҳибсга олишни сўрамоқда. Бу ҳақда ОАВ халқаро тергов журналистлари тармоғига (OCCRP) таяниб хабар берди.

Хабар қилинишича, НCА 1 май куни суддан россиялик миллиардер Петр Авендан 1,1 миллион фунт стерлинг (1,4 миллион доллар)ни мусодара қилишни сўраган.

Миллиардерга 2022 йилнинг 28 февралида Европа Иттифоқи томонидан санкция қўйилган, 15 мартда эса у Буюк Британиянинг санкциялар рўйхатига киритилган ва маблағлари музлатилган. Мамлакат расмийлари Авенни Украинадаги урушни бошлаган «Россия ҳукуматини қўллаб-қувватлашда иштирок этган» деб ҳисоблашади.

Бошланган тергов шуни кўрсатдики, Авеннинг маблағлари унинг вакили сифатида ишлаган Стивен Гейтер ва тадбиркорнинг рафиқаси Екатерина Козина томонидан сақланган.

Икки йиллик терговдан сўнг агентлик суддан Гейтер ва Козина томонидан амалга оширилган тўловлар Британия санкцияларини бузганлиги ва уларни четлаб ўтиш учун қилинганини таъкидлаб, суддан пулнинг катта қисмини мусодара қилишни сўраган.