«Барса»нинг апелляцияси рад этилди

RFEF «Барселона»нинг «Осасуна» билан ўйин санасини ўзгартириш борасидаги апелляциясини рад этди.

Ла Лиганинг 27-тур баҳси 8 март куни бўлиб ўтиши керак эди, аммо каталонияликларнинг шифокори вафот этганлиги сабабли ўйин 27 мартга қолдирилди.

«Барселона» бу қарорга шикоят йўллади, чунки 27 март куни жамоанинг 6 ўйинчиси — Рафиня, Роналд Араухо, Фермин Лопес, Пабло Торре, Жерар Мартин ва Эктор Форт ҳали миллий жамоалар ихтиёридан қайтмаган бўлишади.

Аммо Испания қироллик футбол федерацияси (RFEF) қўмитаси каталонияликларнинг апелляциясини рад этди. «Барса» — «Осасуна» ўйини муносабати билан Ла Лига 28 мартда ўтиши керак бўлган «Атлетик» — «Осасуна» баҳсини 30 мартга қолдирди.