Мьянмадан Бангладешга қочиб келган роҳинжалар лагерида янги коронавирусга чалинган илк бемор аниқланди, дея хабар бермоқда “Евроньюс”.
Ушбу мамлакатда 1 миллиондан ортиқ роҳинжа яшайди. Қочқинлар орасидаги илк бемор Кокс-Базар шаҳрида аниқланган. Айни пайтда бемор даволаняти, у билан алоқада бўлганлар эса карантинган олинган.
Бангладешда коронавирусга чалинганлар сони 19 мингга яқинлашди, беморлардан 300 нафарга яқини вафот этган. 160 миллион аҳоли яшайдиган мамлакатда касалланганлар сони аслида кўпроқ бўлиши мумкин, чунки коронавирус аниқлаш учун тест ўтказиш имконияти чекланган.
Гуманитар ташкилотлар пандемия бошлангандан бери қочқинлар лагерларида коронавируснинг тарқалиши фалокатга сабаб бўлиши мумкинлигини таъкидлаб келади, сабаби лагерларда одамлар жуда зич яшайди. Лагерларда апрель ойи бошидан бери атиги 108 кишида коронавирус тести ўтказилган.
Роҳинжаларнинг кўпчилиги 2017 йилнинг августида Мьянма армияси ўтказган қирғиндан қочиб келган.
