АҚШда мусулмонлар кимни сайлайди?

АҚШда президентлик сайловлари олдидан кўплаб таҳлил марказлари мусулмонлар овози муҳимлигини таъкидламоқда.

Бироқ, кўплаб мусулмонлар ҳар икки партия томонидан сиёсий жиҳатдан яккаланиб қолгандек ҳис қилишади. Сиёсий ноаниқлик даврида мусулмон сайловчилар ҳам учинчи томонлардан номзодларни қўллаб-қувватлаш ҳақида ўйлашмоқда. Мусулмон электорати учун халқаро сиёсатга оид масалалар, айниқса Исроил билан боғлиқ масалалар муҳимлигича қолмоқда.

Америка-Ислом Алоқалари Кенгаши мусулмонларнинг овозлари 2024 йилги президентлик сайловларида вице-президент Камала Харрис ва собиқ президент Доналд Трамп ўртасида ўзгаришлар бўлиши мумкин, деб ҳисоблайди.

Бироқ бу йил кўплаб мусулмонлар ўзига хос сиёсий бошпанасизликни ҳис қилмоқдалар, бу эса уларни бўлажак сайловларда қатнашишдан тийилишларига олиб келиши мумкин. Мусулмонлар сиёсий яккаланиш ҳисси кучайиб бораётгани ҳақида хабар беришади: улар ўзларини ҳеч бир партия, жумладан, республикачилар ҳам, демократлар ҳам тушунмайди ва қабул қилмайди.

Айримлар, шунингдек, мусулмон сайловчилар «камроқ ёвузлик» асосида овоз беришини ва ҳар икки партия ҳам шу йўналишда ташвиқот олиб бораётганини, одамларни энг кам зарарга асосланган танлов қилишга ундашини таъкидламоқда.

Бундан ташқари, айрим мусулмон гуруҳлари ҳам мусулмонларни учинчи партия номзодига овоз беришга чақирмоқда.

Бироқ, хилма-хиллигига қарамай, бутун мусулмон жамиятини ташвишга солаётган асосий масала, албатта, Исроилнинг Ғазодаги геноцидидир.

Бу сўровларда ҳам ўз аксини топди, бу мусулмон сайловчилар одатда ўз номзодларини танлашда мослашувчанлигини ва Ғазодаги можаро каби муҳим сиёсий воқеаларга алоҳида аҳамият беришини тасдиқлайди.

Жорий йилнинг ёзида Ижтимоий сиёсат ва тушуниш институти (ИСПУ) томонидан олиб борилган тадқиқот учта штатда - Жоржия, Пенсилвания ва Мичиганда мусулмонларнинг президентликка овоз бериш ниятлари билан боғлиқ бир қатор тенденцияларни аниқлади.

Тадқиқотда айтилишича, мусулмонлар сиёсий жиҳатдан жуда фаол ва бошқа диний гуруҳларга қараганда мустақил сайловчилар сифатида кўпроқ намоён бўлади. Қайд этилишича, бу борада уларнинг овозлари ҳеч бир партия томонидан ўз-ўзидан қабул қилиниши мумкин эмас – улар қўлга киритилиши керак.