АҚШ Венесуэладан санкцияларнинг бир қисмини олиб ташлайди

Бундан мақсад нефт савдосини осонлаштириш, деди АҚШ молия вазири.

Скотт Бессент Венесуэлага нисбатан қўлланилган айрим санкциялар келаси ҳафтадаёқ бекор қилиниши мумкинлигини айтди. Шунингдек, у Халқаро валюта жамғармаси ва Жаҳон банки раҳбарлари билан учрашиб, Каракас билан ҳамкорликни қайта тиклаш масаласини муҳокама қилишни ҳам режалаштирганини билдирди.

Бессент Reuters агентлигига берган интервьюсида Халқаро валюта жамғармасининг музлатилган деярли 5 миллиард долларлик захира активлари Венесуэла иқтисодиётини тиклашга йўналтирилиши мумкинлигини айтган.

Қайд этилишича, Венесуэла Халқаро валюта жамғармасидан долларга айрибошланиши мумкин бўлган 3,59 миллиардга яқин махсус қарз олиш ҳуқуқига эга.

Бундан ташқари, АҚШ Молия вазирлиги ҳозирда катта қисми кемаларда сақланаётган Венесуэла нефтини сотишдан тушган даромадни Каракасга қайтариш имконини ўрганмоқда.