АҚШ ва Жанубий Корея Шимолий Кореяни Россиядан қўшинларини олиб чиқишга чақирди

Вашингтоннинг даъво қилишича, 10 000 га яқин Шимолий Корея қўшинлари Россияда жойлашган бўлиб, Москва ўз қўшнисига кенг кўламли босқинни давом эттираётган бир пайтда Украина кучларига қарши ҳаракатга тайёр.

Украина уруши давом этар экан, Москва ва Пхенян ўз иттифоқини чуқурлаштирди, бироқ Шимолий Корея қўшинларини Киев қўшинларига қарши жангга жўнатиш Ғарбда хавотир уйғотган жиддий кескинлашувни англатади.

АҚШ Мудофаа вазири Ллойд Остин журналистлар олдида ўзи билан бирга турган Жанубий Кореялик ҳамкасби Ким Ён Хённинг чақириғини такрорлаб, «Мен уларни қўшинларини Россиядан олиб чиқиб кетишга чақираман», деди.

Остиннинг таъкидлашича, Қўшма Штатлар «Россияни бу қўшинларни жанговар ҳаракатларга жалб қилишдан қайтариш учун иттифоқчи ва ҳамкорлар билан ишлашда давом этади».

Жанубий Корея вакили Кимнинг айтишича, Вашингтон ва Киевнинг қайта кўриб чиқишга чақирганига қарамай, Сеулнинг Украинага қурол-яроғ бермаслик ҳақидаги узоқ йиллик сиёсати сақланиб қолмоқда.

Кремлнинг БМТдаги вакили Василий Небензянинг айтишича, Пхенян қўшинлари фронтда эканлиги ҳақидаги ҳар қандай даъволар «шунчаки даъво»дир.