АҚШ ва Эрон бешинчи бор музокара столига ўтирди

Италия пойтахтида Эрон ва АҚШ ўртасида Эрон ядровий дастури атрофидаги келишмовчиликларни ҳал қилиш бўйича музокараларнинг бешинчи раунди бошланди. Бу ҳақда ISNA агентлиги хабар берди.

Унинг сўзларига кўра, Эрон делегациясига ташқи ишлар вазири Аббос Арагчи, Америка делегациясига президентнинг махсус вакили Стивен Уиткофф раҳбарлик қилмоқда. АҚШ делегацияси таркибида Давлат департаментининг сиёсий режалаштириш бўйича директори Майкл Энтон, Эрон делегацияси таркибида ТИВ раҳбари ўринбосарлари Мажид Тахт-Раванчи ва Казем Ғарибободий, ташқи сиёсат идораси матбуот котиби Исмоил Багайи бор. Маслаҳатлашувлар Ўмон элчиси қароргоҳида бўлиб ўтмоқда. Музокараларда Ўмон ТИВ раҳбари Бадр ал-Бусаидий воситачилик қилмоқда.

Эрон Ташқи ишлар вазирлигининг таъкидлашича, унинг бўлажак музокаралардаги асосий мақсади АҚШнинг позициясига ойдинлик киритишдир, эронлик дипломатларнинг сўзларига кўра, бу позиция доимий равишда ўзгариб туради: дастлаб Вашингтон уранни бойитишнинг максимал даражаси 3,67% га рози бўлган (2015 йилги ядровий келишувда ҳам худди шундай шартлар кўзда тутилган эди, аммо 2018 йилда АҚШнинг ундан чиқиши туфайли Эрон бойитиш даражасини 60% гача оширди), энди эса ислом республикасидан бойитиш жараёнини умуман тўхтатишни талаб қилмоқда. Теҳрон бу таклифни рад этди, чунки бу уни саноат ва тиббий мақсадларда фойдаланиладиган ядровий дастурини тўхтатишга мажбур қилган бўларди.

Эрон ва АҚШ ўртасидаги музокараларнинг биринчи раунди 12 апрель куни Масқатда, иккинчиси 19 апрель куни Римда, учинчи ва тўртинчиси 26 апрель ва 11 май кунлари яна Ўмон пойтахтида бўлиб ўтди.