АҚШ Украинага хавфсизлик кафолатларини беради

Владимир Путин билан учрашувдан бир неча кун ўтгач, АҚШ президенти Владимир Зеленскийга Украина жиддий хавфсизлик кафолатларини олишини маълум қилди. Бироқ Трамп Украина бунинг эвазига нимани таъминлаши кераклигини аниқлаштирмади.

«Сезиларли қадамлар ташланди», - деб эълон қилди АҚШ президенти Дональд Трамп Оқ уйда Зеленскийни кутиб олар экан.

Трамп, шунингдек биринчи марта АҚШ Украинанинг хавфсизлик кафолатларини ўз зиммасига олиши мумкинлигини қайд этди.

«Европа – биринчи мудофаа чизиғи. Лекин биз ҳам ёрдам қиламиз, иштирок этамиз», – деди Трамп Украинада америкалик тинчликпарвар кучларнинг мавжудлиги ғоясини рад этмасдан.

Зеленский хавфсизлик кафолатлари «жуда яхши суҳбат»нинг муҳим қисми бўлганини тасдиқлади.

Трамп ва Зеленский икки томонлама учрашувни якунлагандан кейин, уларга етти нафар Европа етакчилари қўшилди. Улар Европанинг ҳудди Украина каби Трампнинг тинчлик шартномаси тузиш бўйича саъй-ҳаракатларини ҳам қўллаб-қувватлашини намойиш этиш учун Вашингтонга боришган.

Трампнинг сўзларига кўра, улар билан Киевга кафолатлар бериш маъносида «ким ва нима қилиши» масаласи муҳокама қилинди.

Шу билан бирга, америкалик сиёсатчиларнинг сўзларига кўра, Россия президенти Владимир Путин Украинага бундай кафолатлар беришга розилик билдирган. Ҳатто бу НАТОнинг 5-моддасига ўхшаш мудофаа шартномаси бўлса ҳам.

Бироқ Россия ҳанузгача Украинанинг НАТОга қўшилиши ва Альянс қўшинларининг унинг ҳудудида жойлашишига қатъий қарши.

«Бу назорат қилиб бўлмайдиган эскалациянинг кучайиши ва олдини олиб бўлмайдиган оқибатларга олиб келиши мумкин», – дея муносабат билдирганди Россия Ташқи ишлар вазирлиги расмий вакили Мария Захарова.