АҚШ Европа давлатининг НАТОдаги аъзолигини тўхтатмоқчи

АҚШ Эрон урушидаги позицияси сабаб Испаниянинг НАТОдаги аъзолигини вақтинча тўхтатмоқчи.

ОАВ хабарига кўра, бу ҳақда АҚШ мудофаа вазирлиги томонидан тарқатилган электрон мактубда сўз боради.

НАТО вакили ушбу хабарга муносабат билдираркан, халқаро тузилманинг таъсис ҳужжатларида бирор бир аъзо давлатнинг аъзолигини вақтинча тўхтатиш ёки уни мажбурий равишда аъзоликдан чиқариш кўзда тутилмагани, фақат муайян давлат ўз ихтиёрига кўра альянсни тарк этиши мумкинлигини маълум қилган.

Мадрид Вашингтоннинг агрессив сиёсатига очиқ қарши чиқмоқда. Хабарингиз бор, жорий йил 28 феврал куни АҚШ ҳамда Исроил Эронга қарши кенг кўламли уруш бошлади. Испания ўз ҳудудидан Эронга зарба бериш учун фойдаланишга рухсат бермади. Бундан дарғазаб бўлган АҚШ президенти Дональд Трамп Испанияга таҳдид қилиб, савдо алоқаларини тўлиқ узишини айтди.

Трампнинг пўписаларига қарамай, Испания бош вазири Педро Санчес АҚШ ва Исроилнинг Эронга қарши урушини қатъий равишда танқид қилиб келмоқда. Сиёсатчи урушни инсоният учун катта фалокат деб атаган ва Вашингтонни 2003 йилда Ироққа бостириб киргани каби ўтмиш хатосини такрорламасликка ундамоқда.

Яқинда ҳам Испанияда Трампнинг MAGA сиёсатига мухолиф бўлган президент ва бош вазирлар йиғилди. Унда Трампнинг нафрат, уруш ва парокандаликка олиб келаётган сиёсатини кескин қораланди.

Президент Трамп НАТОнинг Эронга қарши урушга қўшилмагани, боз устига, Испания, Франция, Италия каби давлатларнинг АҚШ ҳарбий учоқларига ўз ҳаво ҳудудини ёпганидан қаттиқ хафа бўлган.

Трампнинг НАТОдан чиқиш ҳақидаги таҳдидли баёнотлари ҳарбий иттифоқ тарихидаги энг жиддий инқироз деб баҳоланмоқда.

Оқ уйнинг амалдаги маъмурияти НАТО иттифоқчиларини Эрондаги урушга бўлган муносабатига қараб “яхши” ва “ёмон” таснифга ажратувчи ҳужжат тайёрлагани ҳам маълум.