“Амир Темур шажараси“ медиалойиҳаси тузилади

Темурийлар сулоласи дунё тамаддунида энг катта, жаҳон илм-фани, давлатчилиги, маданияти ва санъатига улкан таъсир кўрсатган салтанатлардан бири ҳисобланади.

Шажара ўзининг тарихийлиги ва мукаммаллиги билан қимматли ва аҳамиятлидир.

Ўзбекистон Республикаси Президенти Шавкат Мирзиёев ташаббуси билан ташкил этилаётган Ўзбекистондаги Ислом цивилизацияси маркази экспозициясида Амир Темур давлати рамзларига алоҳида ўрин ажратилади. Марказ ахборот хизмати маълумотига кўра, ушбу муаззам даргоҳда Соҳибқирон билан боғлиқ экспонатлар ўрин эгаллайди.

Маҳаллий ва хориж музейларидан Амир Темур билан боғлиқ экспонатлар мамлакатимизга қайтарилади ва факсимиле нусхалари яратилади.

“Амир Темур шажараси” медиалойиҳаси экспозициянинг энг бой манбаси ҳисобланади.

Тарихий манбаларда Амир Темур шажараси акс этган саҳифаларининг факсимиле нусхалари яратилади ва экспозиция таркибига киритилади.

Буюк саркарда шажарасидаги ҳар бир тарихий шахс ҳақида маълумот берувчи интерактив контент тайёрланади. Ушбу контент тарқатма материал сифатида нашр қилинади ва бу орқали кенг жамоатчиликка тарғиб қилинади.

Ушбу лойиҳаларга Темурийлар тарихи давлат музейи бошчилик қилиши режалаштирилган.

Айни кунларда олимлар ва масъуллар иштирокида Ўзбекистондаги Ислом цивилизацияси маркази экспозициясини ноёб экспонатлар ва артефактлар билан бойитиш бўйича илмий-инновацион лойиҳалар муҳокамалари давом этмоқда.