Альварес учун «Барса»га ўтишнинг ягона варианти қолди

«Mundo Deportivo» хабар беришича, Хулиан Альвареснинг «Атлетико»дан кетиб, «Барселона»га ўтиш учун юридик имконияти қолган.

Клублар ўртасида тўғридан-тўғри келишувга эришиш деярли имконсиз. Бундай вазиятда аргентиналик ҳужумчи профессионал спортчиларнинг меҳнат муносабатларини тартибга солувчи регламент қоидаларидан фойдаланиб, Мадрид клуби билан шартномани бир томонлама бекор қилиши мумкин.

16-моддага кўра, спортчи клубнинг айби бўлмаган ҳолда шартномани ўз ташаббуси билан бекор қилса, клуб компенсация олиш ҳуқуқига эга. Агар компенсация миқдори томонлар ўртасида олдиндан келишилмаган бўлса, уни меҳнат суди спортга оид ҳолатлар, клубга етказилган зарар, шартномани бекор қилиш сабаблари ва бошқа омилларни ҳисобга олган ҳолда белгилайди.

Агар Альварес шартнома бекор қилинганидан кейин бир йил ичида бошқа клуб билан шартнома имзоласа, янги жамоа компенсацияни тўлаш бўйича жавобгар бўлади. Шу тариқа, у «Барселона»га ўтган тақдирда, тегишли харажатлар каталонияликлар зиммасига тушиши мумкин.

Шу билан бирга, «Mundo Deportivo» таъкидлашича, гап Альвареснинг 490 миллион еврони ташкил этувчи тўлиқ товон пули ҳақида кетиши эҳтимоли паст. Компенсация миқдорини суд мустақил равишда белгилаши керак.

26 ёшли форварднинг «Атлетико» билан шартномаси 2030 йилгача амал қилади. Нашр маълумотига кўра, Альварес йилига солиқлардан олдин тахминан 12,5 миллион евро ишлайди — соф даромади эса қарийб 6,2 миллион еврони ташкил этади.

Аввалроқ аргентиналик футболчи келажаги борасидаги ноаниқликлар фонида «Атлетико» билан учинчи кун кетма-кет машғулотларда иштирок этмагани хабар қилинган эди.