Албаниянинг собиқ президенти, “Озодлик” партияси асосчиси Илир Мета Коррупцияга қарши махсус прокуратура буйруғи билан ҳибсга олинди. У пул ювиш, коррупция ва даромадларни яширишда гумон қилинган, деб ёзади Euronews.
Ҳибсга олиш вақтида Илир Мета қаршилик кўрсатишга уринган. Унинг адвокати ҳибсга олинганини тасдиқлади.
У илгари бойликни яшириш ва пул ювишда гумон қилиниб, тергов остида эди. Собиқ давлат раҳбари барча айбловларни рад этди.
55 ёшли Илир Мета Албаниянинг сўлчи Озодлик партияси раҳбари бўлиб, 2017 йилдан 2022 йилгача мамлакат президенти бўлган. У бош вазир Эди Раманинг очиқ рақиби бўлиб, уни "клептократик режим ўрнатишда" айблайди.
Албания Демократик партияси раҳбари Сали Бериша ўтган йилнинг декабрь ойидан бери коррупцияда гумон қилиниб, уй қамоғида сақланмоқда. Мухолифат Рамани рақибларини сиёсий сабабларга кўра таъқиб қилишда айблайди. Бош вазир буни рад этади.
Бунгача Албания пойтахтида тартибсизликлар ва тўқнашувлар содир бўлган эди. Мухолифат бош вазирнинг истеъфосини талаб қилди.
