Aкаев парламентдан собиқ президент мақомини сўраяпти

Қирғизистоннинг собиқ давлат раҳбари Aскар Aкаев мамлакат парламентига собиқ президент мақомини қайтаришни сўраб, мактуб йўллади. Бу ҳақда “Kazinform” агентлиги Қирғиз Республикаси Жогорку Кенеш матбуот хизмати хабарига таяниб ёзган.

Бу хат Конституциявий қонунчилик, давлат тузилиши, суд-ҳуқуқ масалалари ва Регламенти қўмитасига келиб тушган.

Қўмита раиси, депутат Чўлпон Султонбекова кўриб чиқиш жараёни жуда узоқ муддат талаб этиладиган ушбу муаммони тезда ҳал этиб бўлмаслигини айтиб, айни масала ҳозирча кун тартибига киритилмаганини билдирди.

– Кун тартибига киритиш ёки киритмаслик, шунингдек кўриб чиқиш тартибининг бошқа жиҳатлари бўйича қарор биргаликда қабул қилинади, – деди ноиб.

Эслатиб ўтамиз, 1990 йил 27 октябрдан 2005 йил 11 апрелгача Қирғизистон президенти бўлган Aскар Aкаев мамлакатда юз берган “лола инқилоби”дан сўнг Россия Федерациясига чиқиб кетган. Ҳозир ҳам РФда истиқомат қилади ва илмий фаолият билан шуғулланади.

Aввалроқ Қирғиз Республикаси Бош прокуратураси қўзғатилган жиноий иш бўйича Aскар Aкаевни мансаб ваколати ёки мавқеини суистеъмол қилишда иштирок этиш, “Камеко” компанияси билан умумий битим тузиш жараёнига бепарволик қилишда айблаган эди.