Ўз натижасидан норози бўлган абитуриентлар, мандат эълон қилингандан сўнг 10 кун ичида апелляция шикоятини юборишлари мумкин. Бу ҳақда Давлат тест маркази директори ўринбосари Сардор Ражабов хабар берди.
"Апелляция шикоятини my.dtm.uz сайти орқали беришлари мумкин. Ҳозирча бу функция йўқ у сайтда.
Апелляцияда ўзингиз ишлаган тест топшириқлари китоби, жавоблар варақаси ва апелляцион карта Сизга берилади.
Тест топшириқлари китобини кўриб чиқиб, агарда эътирозингиз бўлса экспертга учрашасиз.
Экспертга Сиз ўз эътирозларингизни тушунтириб беришингиз керак бўлади.
Эътирозлар ўринли деб топилса Сизга шу савол учун балл қўшилади.
Агарда эътироз ўринли деб топилмаса, эксперт Сизга бу тўғрисида тушунтириш бериши керак бўлади.
Тест синовларига келмаган ва четлаштирилганлар апелляция шикояти кўриб чиқилмайди.
Такрорий апелляцияга йўл қўйилмайди".
