Прогнозлаштириш ва макроиқтисодий тадқиқотлар институти (ПМТИ) экспертлари томонидан 2016-2022 йилларда Ўзбекистонда цемент саноатининг ривожланиш динамикаси ўрганилди.
2016-йилда мамлакатимизнинг 5 та ҳудудида жойлашган 12 корхонада 8,6 миллион тонна цемент ишлаб чиқарилгани қурилиш саноатини ривожлантириш дастурлари ижросини таъминлашнинг асосий омилларидан бири бўлди.
Цементга талабнинг юқорилиги, бозорни ривожлантиришнинг сезиларли салоҳияти, мамлакатимизда қулай ишбилармонлик муҳитини яратган рағбатлантирувчи давлат сиёсати цемент соҳасига янги инвесторлар эътиборини тортди.
2017-2022 йилларда турли ҳудудларда энергия тежовчи “қуруқ” технологиялар асосида цемент ишлаб чиқарувчи 21 та янги корхона ташкил этилди ва умумий ишлаб чиқариш қуввати 27 миллион тоннага етказилди.
2022-йилда Ўзбекистонда 14,6 миллион тонна цемент ишлаб чиқарилди ва киши бошига ўртача ишлаб чиқариш ҳажми 415 килограммга етди. Бу кўрсаткич дунё миқёсида ўртача 519 килограммни, Хитойда 1770 килограммни, Туркияда 873 килограммни, Россияда 414 килограммни, АҚШда 280 килограммни ташкил қилган.
2017-2022 йилларда қурилиш ишлари ҳажми 71,5 фоизга ошгани ҳолда цемент ишлаб чиқариш ҳажми 69,3 фоизга ошган. Бу бозордаги талаб ва таклифнинг мувофиқлигини кўрсатмоқда.
Келажакда соҳани янада инновацион ривожлантириш учун энергия тежайдиган “яшил” технологияларни жорий этиш, бозорларда талаб юқори бўлган маҳсулот турларини диверсификация қилиш, юқори маркали (М500 ва М600) ва махсус цемент турларини ишлаб чиқаришни сезиларли даражада ошириш кўзда тутилмоқда.
