Шавкат Мирзиёевни Сербия саройида тантанали кутиб олишди

Белграддаги Сербия саройида расмий ташриф билан ушбу мамлакатда бўлиб турган Ўзбекистон Президенти Шавкат Мирзиёевни тантанали кутиб олиш маросими бўлиб ўтди.

Давлат раҳбарини Сербия Президенти Александр Вучич кутиб олди.

Олий мартабали меҳмон шарафига фахрий қоровул саф тортди. Ҳарбий оркестр ижросида Ўзбекистон ва Сербия давлат мадҳиялари янгради. Шунингдек, артиллерия тўпларидан ўн марта ўқ узилиб, тантанали салют берилди.

Шундан сўнг Шавкат Мирзиёев ва Александр Вучич фахрий қоровул сафи олдидан ўтиб, икки мамлакат расмий делегациялари аъзоларини қутладилар.

Биргаликда суратга тушиш маросимидан кейин олий даражадаги музокаралар бошланди.