Зеленский тинчлик режасини референдумга қўядими?

Зеленский агар камида 60 кунлик ўт очишни тўхтатиш эълон қилинса, тинчлик режасини референдумга қўйишга тайёр эканини айтди.

Украина президенти Ахios нашрига берган баёнотида якшанба куни бўлиб ўтадиган учрашувда АҚШ президенти Доналд Трамп билан урушни тўхтатиш бўйича асосий келишувни мувофиқлаштиришга умид қилаётганини айтди.

Зеленский, шунингдек, агар Россия камида 60 кунлик ўт очишни тўхтатишга рози бўлса, ушбу режа вариантини референдумга чиқаришга тайёр эканини билдирди.

Нашрнинг таъкидлашича, Зеленский сезиларли тараққиётга эришилганини айтаётган бўлса-да, Трампнинг режаси ҳануз Украинадан оғриқли ҳудудий ён беришларни талаб қилмоқда. Украина президенти бу шартларни яхшилашга умид қилмоқда. Унинг айтишича, агар ҳудудий масалада “кучли” позицияни эгаллай олмаса, у ҳолда Украина халқининг розилигини олиши керак бўлади.

Ахiоs'нинг ёзишича, АҚШ томони Зеленскийнинг референдум ўтказишга тайёрлигини, шунингдек, унинг ҳудудий ён беришларни энди бутунлай инкор этмаётганини муҳим қадам сифатида баҳоламоқда.

Зеленский бундай референдумни ўтказиш жиддий сиёсий, логистика ва хавфсизлик муаммолари билан боғлиқ бўлишини таъкидлади. У референдумни тайёрлаш ва ўтказиш учун 60 кунлик ўт очишни тўхтатиш “энг камида зарур муддат” эканини айтди.

Юқори мартабали америкалик амалдор Ахios'га Россия томони Зеленский овоз беришни бошлаб юборса, ўт очишни тўхтатишга рози бўлиши мумкинлигини, бироқ янада қисқароқ сулҳ муддатини истаётганини билдирган.