Yamandagi urush Yevropa uchun jiddiy xavf — PISM.

Yamandagi mojaroning keskinlashuvi Yevropa uchun ham jiddiy iqtisodiy va xavfsizlik xavflarini yuzaga keltirishi mumkin. Bu haqda Polsha xalqaro ishlar instituti (PISM) tahlilida qayd etilgan.

Tahlilchilarning fikricha, asosiy xavf xusiylarning Bob-al-Mandab bo‘g‘ozini amalda to‘sib qo‘yish ehtimoli bilan bog‘liq. Mazkur bo‘g‘oz Osiyoni Yevropa bilan Qizil dengiz va Sues kanali orqali bog‘laydigan muhim dengiz yo‘lining bir qismi hisoblanadi.

Agar kemalar harakati cheklansa, yuk tashish xarajatlari oshishi va neft, yoqilg‘i hamda boshqa tovarlar narxi ko‘tarilishi mumkin. Afrika atrofidan o‘tadigan muqobil yo‘nalish esa qariyb ikki haftaga uzunroq.

PISM shuningdek, xusiylar yangi texnologiyalardan foydalanayotganini qayd etgan. Jumladan, raketa trayektoriyalarini dasturlashda Claude til modeli qo‘llangani haqida ma’lumotlar keltirilgan. Shuningdek, soxta ovozdan foydalanilgan dipfeyk orqali raqib kuchlarini chekinishga undashga urinish bo‘lgani haqida xabarlar bor.

Tahlilda ta’kidlanishicha, mojaroning kuchayishi AQShning Fors ko‘rfazi davlatlari xavfsizligini ta’minlashdagi roliga nisbatan shubhalarni ham kuchaytirmoqda.

Ayni paytda hukumat kuchlarining Saudiya Arabistoni ko‘magida xusiylarga qarshi qarshi hujum boshlashi kutilmoqda. Biroq yo‘qotilgan hududlarni yaqin kunlarda qaytarib olish imkoniyati hozircha noaniq.

Mojaroning yanada avj olishi jahon neft bozoriga ham ta’sir ko‘rsatishi mumkin. Tahlilchilarning fikricha, dengiz qatnoviga tahdidning kuchayishi neft va boshqa tovarlar narxining oshishiga olib kelishi ehtimoli bor.