Xusiylar Germaniya armiyasidan ham ko‘p jangchiga ega(mi)?

Eron tomonidan qo‘llab-quvvatlanayotgan Yamanning xusiylar harakati Yaqin Sharqdagi neft tashish yo‘nalishlariga tahdid solmoqda. Mutaxassis Niko Langening fikricha, xusiylarni harbiy yo‘l bilan mag‘lub etish oson emas.

Lange xusiylarni «sandal kiygan oddiy jangchilar» deb tasavvur qilish noto‘g‘ri ekanini ta’kidladi. Uning aytishicha, harakat safida 200 minggacha jangchi bo‘lishi mumkin. Bu Germaniya Bundesveri harbiylari sonidan ham ko‘p.

Xusiylar ixtiyorida ballistik raketalar, zamonaviy dronlar, kemalarga qarshi raketalar va boshqa zamonaviy qurollar borligi aytilmoqda. Ular Yamanning xalqaro hamjamiyat tomonidan tan olingan hukumatiga qarshi kurashmoqda va mamlakatning yetib borish qiyin bo‘lgan hududlarida joylashgan.

Langening ta’kidlashicha, xusiylar Yamanning bir qismi ustidan nazorat o‘rnatgani sababli u yerda yangi jangchilarni osonlik bilan jalb qilishi mumkin.

Mutaxassis xusiylarga Eron yordam berib kelayotganini, shuningdek, ular Rossiyadan ham harbiy jihozlar olgan bo‘lishi mumkinligini aytdi. Uning fikricha, Xitoy ham, masalan, sun’iy yo‘ldosh tasvirlari orqali ularga ma’lum darajada yordam ko‘rsatishi mumkin.

AQSh 2025 yil bahorida xusiylarga qarshi zarbalar bergan, ammo bu harakat guruhni mag‘lub eta olmagan. Keyinchalik Omon vositachiligida sulhga erishilgan.

Axios xabar berishicha, Saudiya Arabistoni valiahd shahzodasi Muhammad bin Salmon o‘tgan hafta AQSh prezidenti Donald Trampga ikki marta qo‘ng‘iroq qilib, xusiylarga qarshi hujumlarni qayta boshlashni so‘ragan.

Biroq Tramp bu taklifni rad etgan. U ochiq bayonotida: «Xusiylar bizga qo‘ng‘iroq qilib, biz bilan urushishni istamasliklarini aytdi», degan.

Niko Lange xulosasiga ko‘ra, Saudiya Arabistoni xusiylarni harbiy yo‘l bilan zaiflashtirishi mumkin, ammo ularni butunlay mag‘lub etishi qiyin.

Uning fikricha, xusiylarni to‘liq yengish uchun xalqaro koalisiya va Yaman muammosi bo‘yicha siyosiy yechim zarur.

📌 Niko Lange — Germaniya Mudofaa vazirligining sobiq maslahatchisi. 2022–2026 yillarda u Myunxen xavfsizlik konferensiyasida katta ilmiy xodim sifatida ishlagan.