Odam savdosi bilan shug‘ullangani uchun qidiruvda bo‘lgan o‘zbekistonlik ayol Turkiyadan topildi. Bu haqda Ichki ishlar vazirligi xabar qildi.
Qayd etilishicha, u 2021-yildan buyon qidiruvda bo‘lgan va Istanbul shahrida yashirinib yurgani aniqlangan. Ushbu shaxs yuqori maosh va’dasi bilan qizlarni aldab Turkiyaga olib borgan va ularning pasportlarini tortib olib, fohishalik bilan shug‘ullanishga majburlagan. U Turkiyadan O‘zbekistonga ekstradisiya qilindi.
1991-yilda tug‘ilgan fuqaroga nisbatan Jinoyat kodeksining 135-moddasi 2-qismi bilan jinoyat ishi qo‘zg‘atilgan. U 18 noyabr kuni belgilangan tartibda mamlakatga olib kelindi.
Joriy yildan O‘zbekistonda odam savdosi uchun belgilangan jazo choralari kuchaytirilgan bo‘lib, mazkur jinoyat uchun 5 yildan 15 yilgacha ozodlikdan mahrum qilish jazosi belgilangan.
