Одам савдоси билан шуғуллангани учун қидирувда бўлган ўзбекистонлик аёл Туркиядан топилди. Бу ҳақда Ички ишлар вазирлиги хабар қилди.
Қайд этилишича, у 2021-йилдан буён қидирувда бўлган ва Истанбул шаҳрида яшириниб юргани аниқланган. Ушбу шахс юқори маош ваъдаси билан қизларни алдаб Туркияга олиб борган ва уларнинг паспортларини тортиб олиб, фоҳишалик билан шуғулланишга мажбурлаган. У Туркиядан Ўзбекистонга экстрадиция қилинди.
1991-йилда туғилган фуқарога нисбатан Жиноят кодексининг 135-моддаси 2-қисми билан жиноят иши қўзғатилган. У 18 ноябрь куни белгиланган тартибда мамлакатга олиб келинди.
Жорий йилдан Ўзбекистонда одам савдоси учун белгиланган жазо чоралари кучайтирилган бўлиб, мазкур жиноят учун 5 йилдан 15 йилгача озодликдан маҳрум қилиш жазоси белгиланган.
