Varshavada Zelenskiyni Polshaning oliy ordenidan mahrum qilishmoqchi

Polsha prezidenti Karol Navroskiy Ukraina prezidenti Vladimir Zelenskiyni Oq Burgut ordenidan mahrum qilish jarayonini boshlab berdi.

Bunga Kiyevning Ukraina Qurolli Kuchlari elita bo‘linmalaridan biriga «UPA Qahramonlari nomidagi» degan nom berish haqidagi qarori sabab bo‘ldi.

Maxsus operasiyalar kuchlari bo‘linmasini qayta nomlash to‘g‘risidagi tegishli farmonni avvalroq Ukraina prezidenti imzolagan edi. Karol Navroskiyning aytishicha, Vladimir Zelenskiyni Polshaning oliy davlat mukofotidan mahrum qilish masalasi 8 iyun kuni bo‘lib o‘tadigan orden kapituli yig‘ilishi kun tartibiga rasman kiritilgan.

Polsha yetakchisi Kiyevning bu qarorini keskin tanqid qilib, Ukraina tomoni ikki davlat o‘rtasidagi munosabatlarning murakkab tarixiy konteksti va fojiali voqealarni butunlay e’tiborsiz qoldirganini ta’kidladi. Uning so‘zlariga ko‘ra, harbiy bo‘linmaga bunday nom berilishi Rossiya propagandasi uchun «eng yaxshi material va qo‘shimcha imkoniyatlar» yaratib bergan.

Ukraina Tashqi ishlar vazirligi esa vaziyatdagi keskinlikni yumshatishga urinib, mazkur qarorga izoh berdi. Vazirlikning rasmiy vakili Georgiy Tixiy elita SSO bo‘linmasining qayta nomlanishi Polsha xalqini haqorat qilish maqsadini ko‘zlamaganini bildirdi.

Uning ta’kidlashicha, zamonaviy ukrainalik harbiylar uchun UPA kurashi, avvalo, Moskvaning imperiyaviy siyosatiga qarshi kurash ramzi hisoblanadi va hech qachon Varshavaga qarshi yo‘naltirilmagan. Shuningdek, u o‘tmishdagi bahslar bugungi ittifoqchilikka putur yetkazmasligi kerakligini, ayniqsa Ukraina Polsha ko‘magida tashqi tajovuzga qarshi kurashayotgan bir paytda bu juda muhim ekanini qayd etdi.

Polshaning oliy davlat mukofoti — Oq Burgut ordeni Vladimir Zelenskiyga 2023 yilda Varshava va Kiyev o‘rtasidagi munosabatlarni mustahkamlashdagi xizmatlari uchun topshirilgan edi. Polsha qonunchiligiga ko‘ra, ushbu mukofotdan mahrum qilish jarayoni murakkab hisoblanadi va tegishli tartib-taomillarga rioya etilishini talab qiladi.