Ukraina Rossiyaning to‘rtta harbiy aerodromiga zarba berdi

Ukraina Qurolli kuchlari Bosh shtabi 14 avgustga o‘tar kechasi Ukraina Rossiya hududidagi to‘rtta harbiy aerodromga hujum qilgani haqida xabar berdi.

Gap Rossiya Federasiyasining Voronej, Kursk va Nijniy Novgorod viloyatlaridagi «Xalino», «Savasleyka», «Borisoglebsk» va «Baltimor» aeroportlari haqida bormoqda.

Ushbu aerodromlarda armiya aviasiyasi, Su-34 qiruvchi-bombardimonchi samolyotlari, Su-35 qiruvchi samolyotlari va boshqa dushman harbiy samolyotlari joylashgan.

Ukraina Qurolli kuchlari ma’lumotlariga ko‘ra, yo‘q qilishning asosiy nishonlari yoqilg‘i-moylash materiallari va aviasiya qurollari bo‘lgan.

Hujum natijalariga oydinlik kiritilmoqda, deya xabar berdi Ukraina qurolli kuchlari bosh shtabi.