Ukraina dronlari Krasnodar o‘lkasidagi neft terminaliga hujum qildi

15 fevral kechasi Ukraina dronlari Rossiyaning Krasnodar o‘lkasidagi "Tamanneftegaz" neft va neft mahsulotlari eksport terminaliga zarba berdi.

Bu haqda Ukraina Bosh shtabi o‘zining Telegram-kanalida e’lon qildi.

Ma’lumotlarga ko‘ra, operasiya 1-alohida SBS markazi tomonidan Maxsus operasiyalar kuchlari va Bosh razvedka boshqarmasi bilan hamkorlikda amalga oshirilgan.

Ushbu ob’ekt neft, neft mahsulotlari va suyultirilgan neft gazlarini keyinchalik dengiz kemalari orqali jo‘natish uchun rezervuarlardan qayta yuklashga ixtisoslashgan. Terminal Rossiya neft eksport infratuzilmasining ishlashini ta’minlaydi va Rossiya Qora dengiz flotining logistika imkoniyatlarini qo‘llab-quvvatlaydi. Uning Qrim ko‘prigi va Qrimga yaqinligi Qora dengizdagi Rossiya guruhiga logistika yordamini ko‘rsatishdagi rolini oshiradi.

Hujum natijasida bir qator portlashlar qayd etildi. Hujumning batafsil natijalari aniqlanmoqda. Bundan tashqari, Bosh shtab ma’lumotlariga ko‘ra, Qrimdagi Kacha qishlog‘i yaqinida "Pansir-S1" havo mudofaasi tizimi muvaffaqiyatli yo‘q qilindi.