Украина дронлари Краснодар ўлкасидаги нефть терминалига ҳужум қилди

15 февраль кечаси Украина дронлари Россиянинг Краснодар ўлкасидаги "Таманьнефтегаз" нефть ва нефть маҳсулотлари экспорт терминалига зарба берди.

Бу ҳақда Украина Бош штаби ўзининг Телеграм-каналида эълон қилди.

Маълумотларга кўра, операция 1-алоҳида СБС маркази томонидан Махсус операциялар кучлари ва Бош разведка бошқармаси билан ҳамкорликда амалга оширилган.

Ушбу объект нефт, нефть маҳсулотлари ва суюлтирилган нефть газларини кейинчалик денгиз кемалари орқали жўнатиш учун резервуарлардан қайта юклашга ихтисослашган. Терминал Россия нефть экспорт инфратузилмасининг ишлашини таъминлайди ва Россия Қора денгиз флотининг логистика имкониятларини қўллаб-қувватлайди. Унинг Қрим кўприги ва Қримга яқинлиги Қора денгиздаги Россия гуруҳига логистика ёрдамини кўрсатишдаги ролини оширади.

Ҳужум натижасида бир қатор портлашлар қайд этилди. Ҳужумнинг батафсил натижалари аниқланмоқда. Бундан ташқари, Бош штаб маълумотларига кўра, Қримдаги Кача қишлоғи яқинида "Панцирь-С1" ҳаво мудофааси тизими муваффақиятли йўқ қилинди.