Tramp Netanyaxuni G‘azo bo‘yicha yon berishga undadi

Oq uy Isroil bosh vaziridan Vashingtonga tashrifidan oldin diplomatik yutuq namoyish etishni talab qildi.

Isroil Bosh vaziri Binyamin Netanyaxu G‘azo sektorida "Xalqaro barqarorlashtirish kuchlari (ISF)"ni joylashtirishning birinchi bosqichiga rozilik bildirganidan so‘ng AQSh prezidenti Donald Tramp bilan uchrashuvga erishdi. Bu haqda Channel 12 telekanali manbalarga tayanib xabar qildi.

Telekanal ma’lumotiga ko‘ra, dastlab Oq uy bunday uchrashuvni tashkil etishga qiziqish bildirmagan va diplomatik kanallar orqali Netanyaxu Vashingtonga aniq diplomatik natija bilan kelishi lozimligini ma’lum qilgan. AQShdagi Isroil elchisi Yexiel Leyter hamda Trampga yaqin maslahatchilar bilan maslahatlashuvlardan so‘ng, bosh vazir G‘azo yo‘nalishidagi ilgarilashni namoyish etishga qaror qilgan.

Xabar qilinishicha, Netanyaxu G‘azoga Xalqaro barqarorlashtirish kuchlarini kiritish masalasini tezlashtirgan. Avvalroq xavfsizlik kabineti ISF faqat HAMAS qurolsizlantirilgandan keyin joylashtirilishi mumkinligini ta’kidlab kelgan edi. Isroillik rasmiylardan birining so‘zlariga ko‘ra, yangi qaror «Trampga nisbatan yaxshi iroda ishorasi» bo‘lib, hukumatning avvalgi pozisiyasidan chekinishni anglatadi.

Avvalroq Isroil xavfsizlik kabineti «do‘st davlatlar»dan 200 nafar ISF harbiy xizmatchisini dastlabki bosqichda kiritishni ma’qullagan edi. Ular Board of Peace tashabbusi doirasida Rafah tumanida tashkil etiladigan tajriba gumanitar hududi xavfsizligini ta’minlashi kutilmoqda.

Tramp va Netanyaxu uchrashuvi Isroil bosh vaziri AQShga yetib borganidan keyin Vashingtonda bo‘lib o‘tishi kutilmoqda.