Tramp: “AQSh Kuba ustidan "do‘stona" nazorat o‘rnatishi mumkin”

Vashington Kubaning maqomini o‘zgartirishning turli variantlarini, jumladan, uning ustidan nazoratni o‘rnatishni ko‘rib chiqmoqda.

AQSh prezidenti Donald Tramp bu haqda Florida shtatining Doral shahrida bo‘lib o‘tgan matbuot anjumanida Gavana bilan mumkin bo‘lgan kelishuv haqidagi savolga javob berar ekan, ma’lum qildi.

"Bu do‘stona yoki nodo‘stona bo‘lishi mumkin. Bu muhim emas, chunki ular aslida o‘z imkoniyatlarining chegarasida. Ularda energiya ham, pul ham yo‘q. Ular chuqur gumanitar inqirozda va biz buni ko‘rishni istamaymiz", deb ta’kidladi Tramp.

Amerika rahbarining so‘zlariga ko‘ra, orolning og‘ir ahvoli kelishuvni muqarrar qiladi. Trampning fikricha, Kuba rasmiylari "yoki kelishuvga rozi bo‘lishadi yoki [AQSH] buni [hukumat almashinuvini] baribir osonlikcha amalga oshiradi".

AQSh prezidenti Donald Tramp 5 mart kuni Vashington Eronga qarshi harbiy operasiya tugagandan so‘ng Kubaga nisbatan keyingi harakatlar yo‘nalishini ishlab chiqish ustida ishlash niyatida ekanligini aytdi. U ilgari bir necha bor Venesuela Qo‘shma Shtatlar bosimi ostida orol davlatiga neft yetkazib berishni to‘xtatganidan keyin Kuba hukumati va iqtisodiyoti qulashga yaqin ekanligini ta’kidlagan edi.