Трамп: “АҚШ Куба устидан "дўстона" назорат ўрнатиши мумкин”

Вашингтон Кубанинг мақомини ўзгартиришнинг турли вариантларини, жумладан, унинг устидан назоратни ўрнатишни кўриб чиқмоқда.

АҚШ президенти Дональд Трамп бу ҳақда Флорида штатининг Дорал шаҳрида бўлиб ўтган матбуот анжуманида Гавана билан мумкин бўлган келишув ҳақидаги саволга жавоб берар экан, маълум қилди.

"Бу дўстона ёки нодўстона бўлиши мумкин. Бу муҳим эмас, чунки улар аслида ўз имкониятларининг чегарасида. Уларда энергия ҳам, пул ҳам йўқ. Улар чуқур гуманитар инқирозда ва биз буни кўришни истамаймиз", деб таъкидлади Трамп.

Америка раҳбарининг сўзларига кўра, оролнинг оғир аҳволи келишувни муқаррар қилади. Трампнинг фикрича, Куба расмийлари "ёки келишувга рози бўлишади ёки [АҚШ] буни [ҳукумат алмашинувини] барибир осонликча амалга оширади".

АҚШ президенти Дональд Трамп 5 март куни Вашингтон Эронга қарши ҳарбий операция тугагандан сўнг Кубага нисбатан кейинги ҳаракатлар йўналишини ишлаб чиқиш устида ишлаш ниятида эканлигини айтди. У илгари бир неча бор Венесуэла Қўшма Штатлар босими остида орол давлатига нефть етказиб беришни тўхтатганидан кейин Куба ҳукумати ва иқтисодиёти қулашга яқин эканлигини таъкидлаган эди.