Shahar markazida velosipedda yurish taqiqlandi

Italiyaning Komo shahri meri Alessandro Rapineze elektrovelosiped uni urib yuborganidan so‘ng shaharning tarixiy markazida velosipedda yurishni taqiqladi. Xabar qilinishicha, sentyabrdan boshlab shahardagi 30ga yaqin ko‘chada velosiped haydash taqiqlanadi. Velosipedchilar ushbu hududlarda velosipedini yetaklab, piyoda yurishlariga to‘g‘ri keladi. Ushbu qaror mahalliy aholi noroziligiga sabab bo‘ldi. Faollar taqiq bekor qilinishi uchun imzo yig‘ishni boshlab yuborishdi. Velosipedchilar esa sentyabr o‘rtalarida velosipedda yurish taqiqlangan ko‘chalarda norozilik marshini o‘tkazishmoqchi. «Meni elektrovelosiped urib yuborgani uchun ushbu qarorni chiqarganlikda ayblashyapti. Bu shubhasiz to‘g‘ri. Odam o‘z tajribasidan kelib chiqib harakat qiladi va men bu ablahlardan biri urib ketishi qanday bo‘lishini yaxshi bilaman», — dedi Rapineze. Iyun oyida mer shahar ma’muriyati binosidan chiqib kelayotganida uni elektrovelosiped urib yuborgan va qochib ketgan. Rapineze ushbu taqiqni turistlar gavjum joylarda xavfsizlikni ta’minlash zarurati bilan izohladi. Cheklov oddiy velosipedlarga ham, elektrovelosipedlarga ham birdek taalluqli bo‘ladi.