Rossiyadagi migrant kurerlar maosh bo‘yicha AyTi xodimlariga yetib oldi

Iyun oyida Rossiyada mehnat muhojirlarining maoshlari o‘sishi qayd etildi. Ular o‘rtacha hisobda 23 foizga ko‘p maosh ola boshladilar, dedi migrasiya kun tartibi va kadrlarni yollash bo‘yicha ekspert, Migrantlar xizmati platformasi direktori Andrey Kladov. Yetkazib berish sohasida muhojirlar bugungi kunda AyTi-mutaxassislari bilan teng daromad olishadi, dedi u NSN nashriga bergan intervyusida.

Kladovning so‘zlariga ko‘ra, o‘tgan yilning dekabr oyiga kelib, kadrlar yetishmasligi fonida migrantlarning maoshi 120 ming rublga yetgan.

"Kurerlik lavozimlarida ishlaydigan migrantlar boshlang‘ich va o‘rta darajadagi AyTi mutaxassislari bilan teng ravishda oyiga taxminan 155 ming rubl ishlay boshladilar, shu bilan birga yetkazib berish xizmatlarida ham, AyTi-sanoatda ham kadrlar yetishmasligi kuchaymoqda", - dedi ekspert.

Shu bilan birga, hozirda Migrantlar xizmati platformasida 2 milliondan ortiq odam ro‘yxatdan o‘tgan va ish takliflari sezilarli darajada kam, deya qo‘shimcha qildi Kladov. U bu qarama-qarshilikni ish beruvchilarning kadrlar izlashda yetarlicha faol emasligi, shuningdek, xodimlarni saqlab qola olmasligi bilan izohladi.

Bungacha Rossiyada muhojirlarni boshqaruvchi yollash bo‘yicha federal loyihani amalga oshirish rejalari haqida ma’lum bo‘lgan edi. Rossiya kompaniyalari uchun kadrlar markazi bo‘lib xizmat qiladigan uyushgan yollash operatorini yaratish rejalashtirilgan.Shuningdek, chet elda tibbiy ko‘rikdan o‘tkazish, barmoq izlari va rus tilini bilish darajasini tekshirish taklif qilinmoqda.