Rossiya prezidenti Vladimir Putin Sankt-Peterburg xalqaro iqtisodiy forumining yalpi majlisida Ukraina prezidenti Vladimir Zelenskiy bilan shaxsiy uchrashuv o‘tkazishdan hozircha ma’no ko‘rmayotganini bildirdi.
«Uchrashuvning ma’nosini ko‘rmayapman. Avvalo, yechim topishimiz kerak», — dedi Putin forum moderatori, hindistonlik jurnalist Gita Mohanning savoliga javob berar ekan.
Uning ta’kidlashicha, tomonlar avval muayyan kelishuvlarga erishishi lozim.
«Ukraina tomoni uchun qurolli kuchlarimizning hujumini to‘xtatish mantiqan to‘g‘ri bo‘lardi. Ammo bizga kelishuvlar kerak. Mutaxassislar ishlasin, ayrim yechimlarni ishlab chiqsin, shundan keyin uchrashishimiz mumkin», — dedi Rossiya rahbari.
Putinning aytishicha, uning matbuot kotibi Dmitriy Peskov bir kun avval Zelenskiyning ochiq xati bilan tanishtirgan. Prezidentning so‘zlariga ko‘ra, ushbu maktubda «qo‘pollik unsurlari» mavjud bo‘lgan.
Nutqining boshida Putin Zelenskiyning ismini tilga olmay, uni «xat muallifi» va «bu janob» deb atadi. Keyinroq esa Ukraina prezidentining familiyasini aytdi.
Bir kun avval Vladimir Zelenskiy Vladimir Putinga ochiq maktub yo‘llab, Ukraina Rossiya uchun urush xarajatlarini sezilarli darajada oshirish imkoniyatiga ega ekanini ta’kidlagan va jangovar harakatlarni to‘xtatish maqsadida shaxsiy uchrashuv o‘tkazish taklifini yana bir bor bildirgan edi.
Putinning bayonoti Rossiya rahbariyati hozircha to‘g‘ridan-to‘g‘ri sammitdan ko‘ra, avval muzokarachilar va ekspertlar darajasida aniq kelishuvlar ishlab chiqilishini afzal ko‘rayotganini ko‘rsatmoqda.
O‘zbekistonda yangi ko‘l paydo bo‘ldi
Rossiya Moliya vazirligi va Markaziy bank Putinni ogohlantirdi
2026 yil yozda Markaziy Osiyo mamlakatlarida anomal darajada kuchli yog‘ingarchiliklar kuzatilishi mumkin
