Polsha o‘z harbiy texnikasini Ukrainadagi jang maydonlarida sinovdan o‘tkazadi

Mamlakat Mudofaa vazirligi rahbari o‘rinbosari Sezariy Tomchik Polshada ishlab chiqarilgan harbiy texnikalar endilikda bevosita Ukrainadagi jang harakatlari davomida sinovdan o‘tkazilishini ma’lum qildi.

Tomchikning ta’kidlashicha, Ukraina hozirda xorijiy armiya bilan to‘g‘ridan-to‘g‘ri to‘qnashuv ketayotgan dunyodagi yagona va o‘ziga xos "poligon" hisoblanadi.

Rejaga ko‘ra, Polsha qurol-aslahalari avval o‘z mamlakatidagi milliy poligonlarda tekshiriladi, so‘ngra ularning qay darajada samarali ekanini aniqlash uchun real jang sharoitlariga yuboriladi.

Vazir o‘rinbosarining fikricha, bunday amaliyot qaysi texnikalar real sharoitda kutilgan natijani berayotgani va qaysilarini takomillashtirish zarurligi haqida eng aniq manzarani taqdim etadi. Shu bilan birga, xabarda Ukrainada vaqti-vaqti bilan Yevropa davlatlarining o‘z armiyalarini qayta qurollantirish uchun Ukrainadagi urushdan vaqt yutish vositasi sifatida foydalanayotgani haqida tanqidiy fikrlar aytilib turishi ham eslatib o‘tilgan.