Netanyaxu va Smotrich Makronga dars bermoqchi bo‘lishdi

Fransiya prezidenti Emmanyuel Makronning G‘azodagi vaziyat va Iordan daryosining G‘arbiy sohilidagi isroillik ko‘chmanchilar zo‘ravonligi haqidagi tanqidlari Isroil rahbariyatining keskin munosabatiga sabab bo‘ldi.

Isroil bosh vaziri Binyamin Netanyaxu Makronning BMT Bosh Assambleyasidagi bayonotlarini keskin qoralab, Parijning ayblovlarini «ochiqdan-ochiq bema’nilik» deb atadi. Moliya vaziri Besalel Smotrich esa Makronni yolg‘on gapirishda ayblab, isroillik aholi punktlarini kengaytirish rejalarini davom ettirishini bildirdi.

Isroilning BMTdagi doimiy vakili Danni Danon ham Fransiyani Isroilni tanqid qilishdan oldin «faktlarni tekshirishga» chaqirdi.

Biroq Isroil muxolifati yetakchisi Yair Lapid Netanyaxuning pozisiyasini tanqid qildi. Uning aytishicha, bosh vazirning vazifasi ijtimoiy tarmoqlarda javob qaytarish emas, balki mamlakatdagi voqelikni o‘zgartirishdan iborat. Lapid Netanyaxu siyosati Isroilni jiddiy diplomatik inqirozga olib kelganini ta’kidladi.

Mojaro Makronning BMT minbaridan qilgan nutqidan keyin kuchaydi. Fransiya prezidenti G‘azodagi og‘ir gumanitar vaziyatni tanqid qilib, gumanitar yordam yo‘laklarini ta’minlash bo‘yicha sa’y-harakatlar muvaffaqiyatsiz bo‘lganini bildirdi. U G‘arbiy sohildagi isroillik ko‘chmanchilar zo‘ravonligi kuchayishi hamda bu holatning falastinliklarga ta’siri haqida ham gapirdi.

Shu bilan birga, Isroil bosh vaziriga nisbatan ichki siyosiy bosim ham saqlanib qolmoqda. Netanyaxuga qarshi sud jarayonlari davom etmoqda, Xalqaro jinoiy sud esa unga G‘azodagi harbiy jinoyatlar bo‘yicha ayblovlar doirasida hibsga olish orderini bergan.