Moskva aholisi benzin uchun joy talashib mushtlashdi

Guvohlarning «Ostorojno, novosti»ga aytishicha, janjal 18 avgust kuni soat 23:10 da Leningrad shossesida sodir bo‘lgan. Ikki erkak AYOQShdagi navbatda joy talashib qolgan va tortishuvdan so‘ng bir-birini ura boshlagan. Keyinroq ularga nafaqadagi kishi ham qo‘shilgan. Erkaklarni ajratishga guvohlar aralashgan, janjal ishtirokchilaridan birining futbolkasi yirtilgan. Shundan so‘ng ular bir-birini tayoq bilan tahdid qilgan. Bu voqea Moskvada yoqilg‘i uchun navbatlar yana ko‘paygan paytga to‘g‘ri keldi. RBK ma’lumotlariga ko‘ra, ayrim AYOQShlarda benzin sotuviga limit joriy qilingan: «Gazprom neft» shoxobchalarida bir bakka 40–60 litrgacha, «Tatneft»da esa 50 litrgacha benzin va 60 litrgacha dizel sotilmoqda. Ayrim shoxobchalarda navbatlar yuzaga kelgani haqida moskvaliklar shikoyat qilmoqda.