Meksika markazidagi San-Luis Potosi shahri yaqinida yo‘lovchi avtobusi va TIR yuk mashinasining to‘qnashuvi oqibatida kamida 10 kishi halok bo‘ldi, 10 kishi jarohat oldi.
Bu haqda «Heraldo de Mexico» nashri ma’lum qildi, deb yozadi «Report».
Qayd etilishicha, halok bo‘lganlar orasida to‘rt nafar voyaga yetmaganlar ham bor. Jarohatlanganlar shifoxonalarga yetkazilgan, ularning ba’zilarining ahvoli og‘ir.
Qayd etilishicha, yuk mashinasi haydovchisi voqea joyidan qochib ketgan. Polisiya hodisa sabablarini o‘rganmoqda.