Janubiy Koreyada erkak qarz sabab oila a’zolarini o‘ldirdi

U buning uchun ularga uxlatuvchi dori berib, keyin bo‘g‘gan.

Janubiy Koreyada erkak o‘z oilasining besh nafar a’zosini o‘ldirgani uchun umrbod qamoq jazosiga hukm qilindi. Bu haqida mahalliy nashrlar xabar bermoqda.

Suvon tumani sudi ma’lum qilishicha, 50 yoshlar atrofidagi Li familiyali erkak avval ota-onasi, rafiqasi va ikki qiziga uxlatuvchi hamda tinchlantiruvchi dori bergan, so‘ng ularni bo‘g‘ib o‘ldirgan. Unga nisbatan giyohvand moddalar nazorati qonunini buzish va qasddan odam o‘ldirish ayblovlari qo‘yilgan.

Prokuratura o‘lim jazosini talab qilganiga qaramay, sud ayblanuvchiga umrbod qamoq jazosini tayinladi. Ma’lumotlarga ko‘ra, Li tadbirkor bo‘lib, milliardlab von qarzga botgan.

Li o‘zini biznesdagi muvaffaqiyatsizlik, milliardlab vonlik qarz va sud jarayonlari tufayli qarz yukining oilasiga qolishidan qo‘rqib, ularni o‘ldirish rejasini tuzgan. U oila a’zolariga ovqatga aralashtirilgan uxlatuvchi dori berishga tayyorlangan, bu tafsilotlar sud materiallarida qayd etilgan.