Eron Netanyahuning tahdidlariga javoban Isroilga «yakunlanmagan ishlar» borligini eslatdi.

Eron tashqi ishlar vaziri Abbos Aroqchining ta’kidlashicha, Tehron va Isroil o‘rtasida hali «yakunlanmagan ishlar» bor. U bu haqda Isroil Bosh vaziri Binyamin Netanyahuning Eron bilan qarama-qarshilikda «ishni oxiriga etkazish» zarurligi haqidagi bayonotlariga javoban ma’lum qildi.

«Siz oxirgi marta “ishni yakunlash”ni istaganingizda, Eron avvalgidan ham kuchliroq bo‘ldi. Yana omadingizni sinab ko‘rmoqchimisiz? Marhamat, ammo ehtiyot bo‘ling — bizning ham hali yakunlanmagan ishlarimiz bor», — deb yozdi Aroqchi X ijtimoiy tarmog‘ida.

Eron tashqi ishlar vaziri, shuningdek, Netanyahuni o‘zining ichki siyosiy va sud bilan bog‘liq muammolaridan e’tiborni chalg‘itish maqsadida AQShni yangi harbiy mojaroga jalb etishga urinishda aybladi.