Isroil sobiq mudofaa vaziri Netanyaxuni hokimiyatdan chetlatishga chaqirdi

Isroilning sobiq mudofaa vaziri va Bosh shtabi sobiq rahbari Moshe Yaalon bosh vazir Binyamin Netanyaxuni mavjud harbiy mojarolarni ataylab saqlab qolayotgani va yangi frontlar ochayotganlikda ayblab, Isroil muxolifatini uni hokimiyatdan chetlatishga chaqirdi.

Bu bayonotga Isroilning Suriyaning Idlib viloyatidagi Abu-al-Duhur aviabazasiga bergan zarbasi sabab bo‘ldi. Yaalonning so‘zlariga ko‘ra, Netanyaxuning harakatlari Turkiya bilan munosabatlarni yanada keskinlashtirgan va AQSh tomonidan salbiy reaksiyaga sabab bo‘lgan.

Yaalon Netanyaxu 2023 yil 7 oktyabr voqealari va undan keyingi inqiroz uchun javobgarlikdan qochish maqsadida harbiy keskinlikni saqlab qolishga intilayotganini ta’kidladi.

Sobiq vazir, shuningdek, Eron va «Hizbulloh»ning Suriyadagi mavqelari zaiflashganidan so‘ng Isroil Suriyadagi «imkoniyatni qo‘ldan boy bergani»ni bildirdi.

Hukumatning G‘azodagi siyosatini tanqid qilgan Yaalonning aytishicha, oxir-oqibat AQSh prezidenti Donald Tramp Turkiya va Qatar ishtirokidagi Tinchlik kengashini hamda 15 banddan iborat rejani Isroilga qabul qildirgan. Sobiq vazirning bahosicha, bu reja Isroil manfaatlariga javob bermaydi.

Yaalonning so‘zlariga ko‘ra, Netanyaxu va Tramp o‘rtasida Livan hamda Eron masalalari bo‘yicha ham kelishmovchiliklar yuzaga kelgan. Uning ta’kidlashicha, Isroil bosh vaziri Tehronda hokimiyat almashishini amalga oshirishga uringan va shu orqali avvalgi siyosiy muvaffaqiyatsizliklarni qoplaydigan yutuqqa erishishni maqsad qilgan.

Yaalon Isroil muxolifati yetakchilarini Netanyaxuni hokimiyatdan chetlatishga e’tibor qaratishga chaqirdi. Uning fikricha, bu «tinch aholi va harbiylarning hayotini saqlab qolish» hamda yanada ko‘proq vayronagarchiliklarning oldini olish uchun zarur.