Isroil 2000 dan ortiq falastinlik bolani o‘g‘irlagan

2023 yil oktyabridan buyon Isroil harbiylari 2000 dan ortiq falastinlik bolani o‘g‘irlab ketgan. Huquq himoyachilari ma’lumotlariga ko‘ra, kamida 350 nafar voyaga etmagan bola hanuz garovda ushlab turilibdi va ular shafqatsiz muomalaga duchor bo‘lmoqda.

Isroil 2023 yil oktyabr oyida G‘azo sektorida genosid boshlanganidan buyon 2000 dan ortiq falastinlik bolani o‘g‘irlab ketgan va garovda ushlab turgan. Bu haqda Falastin mahbuslari ishlari bo‘yicha jamiyat hisobotida aytilgan.

Tashkilot ma’lumotlariga ko‘ra, kamida 350 nafar voyaga etmagan bola hanuz og‘ir sharoitlarda Isroil qamoqxonalarida saqlanmoqda.

Faqat o‘tgan tunning o‘zida Isroil harbiylari bosib olingan G‘arbiy sohilning Al-Xalil viloyatidagi Sair va Ash-Shuyux aholi punktlarida olti nafar bolani o‘g‘irlab ketgan.

Huquq himoyachilari falastinlik bolalarga nisbatan qo‘rqitish, qiynoqqa solish, oziq-ovqatdan mahrum qilish, yakkalab qo‘yish va tibbiy yordam ko‘rsatishni rad etish holatlari ko‘payib borayotganini ma’lum qilmoqda.

Ayni paytda G‘azo sektorida garovga olingan voyaga etmaganlar soni aniq emas. Tashkilot buni majburiy g‘oyib qilish amaliyoti davom etayotgani va bedarak yo‘qolgan minglab falastinliklarning taqdiri haqida ma’lumot yo‘qligi bilan izohlamoqda.

Ayniqsa, Isroil tomonidan ma’muriy qamoqqa olish amaliyoti qo‘llanilayotgani jiddiy xavotir uyg‘otmoqda. Bu amaliyot odamlarni ochiq e’lon qilingan ayblovsiz va ozodlikka chiqarishning aniq muddatisiz qamoqda saqlash imkonini beradi.

Huquq himoyachilarining baholashicha, bunday amaliyot bolalarni ta’limni davom ettirish va oilalari bilan odatiy munosabatlarni saqlab qolish imkoniyatidan mahrum qiladi.

Hisobotda voyaga etmaganlarning Isroil qamoqxonalarida saqlanishi og‘ir oqibatlarga olib kelgan holatlar ham keltirilgan.

2025 yil mart oyida «Megiddo» qamoqxonasida falastinlik o‘smir Valid Xolid Ahmad vafot etgan. Tibbiy ma’lumotlarda uning qattiq ozib ketgani, to‘yib ovqatlanmagani va suvsizlanishdan aziyat chekkani ko‘rsatilgan. Shunga qaramay, uning o‘limi holatlari bo‘yicha tergov to‘xtatilgan.

Yana bir holat 15 yoshli Muhammad Hamid bilan bog‘liq. U «Ofer» qamoqxonasida saqlanayotgan vaqtida qo‘tir kasalligini yuqtirib olgan. Uning ahvoli yomonlashib, infeksiya hayotiy muhim a’zolarini ham zararlagan.

O‘smirning yuragida jarrohlik amaliyotlari o‘tkazilgan, u og‘ir ahvolda jonlantirish bo‘limida yotgan. Keyinchalik uning oyog‘i amputasiya qilingan.

Tashkilot ma’lumotlariga ko‘ra, Isroil hukumati Hamidning sog‘lig‘i keskin yomonlashganidan keyin uni ozod qilgan. O‘smir qariyb uch oydan beri davolanishni davom ettirmoqda.

Huquq himoyachilari uning ozod etilishini Isroil hokimiyatining tibbiy yordam ko‘rsatish uchun javobgarlikdan qochishga urinishi sifatida baholagan.

Falastin mahbuslari ishlari bo‘yicha jamiyat xalqaro hamjamiyatni noqonuniy ravishda ushlab turilgan bolalarni ozod qilish, ma’muriy qamoqqa olish, qiynoqqa solish, majburiy so‘roq qilish va tibbiy yordam ko‘rsatishni rad etish holatlariga chek qo‘yishga erishishga chaqirdi.

Tashkilot ta’kidlashicha, xalqaro munosabatlar qoidabuzarliklarni qayd etish va qoralovchi bayonotlar bilan cheklanib qolmasligi kerak. Falastinlik bolalarning hayoti va huquqlarini himoya qilish, shuningdek, aybdorlarni javobgarlikka tortish uchun aniq choralar ko‘rish zarur.